মা, মই আজি সোণ বৰণৰ

ৱিকিউৎসৰ পৰা
নেভিগেশ্যনলৈ যাওক সন্ধানলৈ যাওক


মা, মই আজি
সোণ বৰণৰ
          সপোন দেখিলোঁ
তোৰ আঙুঠিৰ ৰঙা বাখৰ
          পাখি পিন্ধি উৰা দেখিলোঁ৷
মা, অ’ মা
          তোৰ যে মা
                ৰঙা বগা হালধীয়া
                         কেচৰছীয়া
                               ৰিহা এখন আছিল
তাৰ নিচিনা
          চৰাই এটাই
                মোৰ কাষলৈ আহিল৷
মা, অ’ মা
          মই টুক্‌ বুলিলে
          সি কুতুক্‌ কুতুক্‌ কৰে
আৰু ঘুৰ বুলিলে
          লৰমাৰি গৈ ফুৰ-ফুৰকৈ উৰে
বুইছ’ মা, তাৰ চকু দুটা
          ঠিক, তোৰ আঙুঠিৰ বাখৰ
আৰু গোটেই গাতে অঁকা বঁকা
          সোণৰ-ৰূপৰ আখৰ৷৷