এই পৃষ্ঠাটোৰ বৈধকৰণ হৈছে
বিসৰ্জ্জন
সখী মোৰ ই বুকুত যিখিনি আছিল ব্যথা
আপোন কপাল দোষি দিছো দলিয়াই,
প্ৰিয়ে মোৰ অভিমান আছিল যিকণি বাকী
কলঙত দিছো আজি তাকো উটুৱাই।
✷ ✷ ✷
সেই দিনা যৌৱনৰ প্ৰথম পুৱাতে বহি
লেখনী হাতত ল’ই লিখোতে কবিতা,
লেখনী লিখনী হৈ আঁকিলে যিখনি ছবি
জনমে মৰণে মোৰ নিতে পৰিচিতা।
সেই দিন৷ সেই ছবি চাওঁতে নোহোৱা হ’ল
শূন্য কৰি অভাগাৰ পূজাৰ আসন,
মূৰ্ত্তিহীন পূজাঘৰ এতিয়াও আছে পৰি
কাষত গজিছে তাৰ কাঁইটীয়া বন।
✷ ✷ ✷
সখী মোৰ ই বুকুত যিখিনি আছিল ব্যথা
আপোন কপাল দোষি দিছো দলিয়াই,
প্ৰিয়ে মোৰ অভিমান আছিল, যিকণি বাকী
কলঙত দিছো আজি তাকো উটুৱাই।
⸻⸺
[ ৬৮ ]
