যিজন পুত্ৰ তেৱেঁই ডাঙ্গৰীয়া ৺দীননাথ বেজবৰুৱাৰ পিতামহ।
অঙ্গদ বৰুৱাৰ পুত্ৰ কৃষ্ণৰাম : কৃষ্ণ ৰাম বেজবৰুৱা ৰাজেশ্বৰসিংহ
স্বৰ্গদেৱৰ বেজবৰুৱা আছিল। কৃষ্ণৰাম বেজবৰুৱাৰ পুত্ৰ
জ্যেষ্ঠ হলিৰাম বৰুৱা, আৰু কনিষ্ঠ দীননাথ বেজবৰুৱা।
দীননাথ বেজবৰুৱা পুৰন্দৰসিংহ স্বৰ্গদেৱৰ বেজবৰুৱা আছিল।
হলিৰাম বৰুৱা সুবিখ্যাত ৺ পূৰ্ণানন্দ বৰুৱা “ছোটচাহাবৰ”
পিতামহ।
⸻⸻
আত্মজীৱন চৰিত
কলিকতাত প্ৰকাশিত ৪ৰ্থ ভাগ জোনাকীত হেমচন্দ্ৰ বৰুৱাই কেইজনমান বন্ধুৰ অনুৰোধত আত্ম-জীৱন চৰিত প্ৰকাশ কৰি গৈছে। গতিকে তেখেতৰৰ সংক্ষিপ্ত জীৱনী স্বৰূপে আত্মচৰিত তলত প্ৰকাশ কৰা গল—
১৭৫৭ শকত আঘণ মাহৰ ২৪ দিন যাওঁতে মঙ্গলবাৰে কৃষ্ণা চতুৰ্থীৰ ৰাতি শিৱসাগৰ জিলাৰ ৰজা-বাহৰ নামে ঠাইৰ পৈতৃক ঘৰত মোৰ জন্ম হয়। মোৰ পিতৃৰ নাম মুক্তাৰাম বৰুৱা; তেওঁ সংস্কৃত ভাষাৰ আৰু বৈদ্যশাস্ত্ৰৰ পাৰদৰ্শিতাৰ নিমিত্তে প্ৰখ্যাত আছিল। আমাৰ পূৰ্ব্ব পুৰুষসকলে অসম ৰজাৰপৰা যি যি বিষয় পাইছিল, সেইবোৰৰ কথা লিখিবৰ সকাম নাই; কিয়নো সেই কথাৰ অলপ-অচৰপ এই দেশৰ প্ৰায় সকলো লোকৰ জনা আছে। অসম ইংৰাজৰ ৰাজ্য হোৱাৰ কিছুমান বছৰৰ মুৰত মুক্তাৰাম বৰুৱা নিজ মিছামৰা