এই পৃষ্ঠাটোৰ বৈধকৰণ হৈছে
১৪
সৌপ্তিক পৰ্ব্ব।
খড়গ দিয়া অন্তৰ্ধান হলে পশুপতি।
কৃপাচাৰ্য্যে কৰ অশ্বত্থামা মহামতি॥
ইটো দ্বাৰ মুখে তোম থাকা দুইজন।
কাটিবাঁহা তাৰ মুণ্ড আহিব যি জন॥
হাতে খড়গ প্ৰবেশ কৰিলে অশ্বত্থামা।
নিদ্ৰাগত জনে কাটে নকৰয় ক্ষমা॥
ধৃষ্টদ্যুম্ন শুতিয়াছে পালঙ্ক উপৰ।
দেখিয়া তাহাক অশ্বত্থামা বীৰবৰ॥
হাতে খড়গ কৰি ধায় মহা ক্ৰোধ মনে।
হাঁহিয়া ধৰিলে তাক দ্ৰোণৰ নন্দনে॥
দুই হাত ধৰি তাক উপৰে বসিলে।
পশুবৎ কৰি তাক মাৰিৰে ইচ্ছিলে॥
দ্ৰৌণিক দেখিয়া বীৰ দ্ৰোপদ নন্দন।
সকৰুণ স্বৰে কয় বিষণ্ণ বদন॥
খড়েগ মুণ্ড কাটি মোক নকৰা নিধন।
যুদ্ধ কৰি কৰা বীৰ স্বকাৰ্য্য সাধন॥
দ্ৰৌণিয়ে হয় ব্ৰহ্ম বধী দুৰাচাৰ।
পশুবৎ কৰি তোক কৰিম সংহাৰ॥
এই বুলি ধৃষ্টদ্যুম্নে দ্ৰোণৰ তনয়।
বজ্ৰ মুষ্ঠি প্ৰহাৰ কৰিলে অতিশয়॥
