এটা পূৰ্ণ আৰু সৰ্ব্বশক্তিমান ইষ্টদেব কল্পনা কৰা, তেওঁৰ পূৰ্ণত্ব,সৰ্ব্বশক্তি বা এটা মাত্ৰ শক্তি এই আকাশৰ মাজত কত আছে? তোমাৰ শক্তি তোমাৰে স্বৰূপ মাত্ৰ। সেইদৰে ব্ৰহ্ম শক্তি ব্ৰহ্মৰে স্বৰূপ, ব্ৰহ্মৰ পৰা বেলেগ একো নহয়। জগতত এই যে সমস্ত নাম ৰূপ শক্তি দেখিছা ই কাৰ স্বৰূপ আৰু শক্তি? এক মাত্ৰ সৰ্ব্বশক্তিমান
পূৰ্ণপৰব্ৰহ্ম জ্যোতিঃস্বৰূপৰ বাহিৰে দ্বিতীয় আৰু কাৰ স্বৰূপ আৰু নাম ৰূপ শক্তি হব পাৰে? মিছাকৈ কিয় মান, অপমান সামাজিক স্বাৰ্থৰ নিমিত্তে সত্যক অসত্য আৰু অসত্যক সত্য, মিত্ৰক শত্ৰু আৰু শত্ৰুকে মিত্ৰ বোধে ভ্ৰমত পৰি আনকো ভ্ৰমত পেলাইছা? এয়ে জগতৰ অমঙ্গলৰ কাৰণ হৈছে। সৰ্ব্বশক্তিমান ইষ্ট দেবতা নিৰা-
কাৰ সাকাৰ চৰাচৰে সৈতে অখণ্ডাকাৰে বিৰাট পূৰ্ণ আৰু সৰ্ব্বশক্তিমান ৰূপে স্বতঃ বিৰাজমান আছে। তেওঁক চিনি পূৰ্ণৰূপে উপাসনা কৰি জগতৰ মঙ্গল স্থাপনা কৰা। নতুবা পূৰ্ণ উপাসনাৰ অঙ্গহীন আৰু জগতৰ অমঙ্গল হব।
ধৰ্ম্ম কাক বোলে?
ধৰ্ম্ম সকলোৰে পালন কৰা কৰ্ত্তব্য। ধৰ্ম্ম পালন নকৰিলে জ্ঞান আৰু মুক্তি নহয়, ধৰ্ম্মহীন মনুষ্য পশুৰ সমান। অনেকৰ সংস্কাৰ আছে যে “ধৃ” ধাতুৰ পৰা ধৰ্ম্ম শব্দ হৈছে। “ধৃ” ধাতু অৰ্থাৎ যাৰ দ্বাৰাই ধৃত আছে বা ধাৰণ কৰা যায় তাকে ধৰ্ম্ম বোলে। কিন্তু “ধৃ” ধাতু (ধৰ্ম্ম) কি বস্তু তাক নাজানি আৰু বিচাৰ নকৰি কেবল ধৰ্ম্ম শব্দ লৈ নানা প্ৰকাৰ তৰ্ক-বিতৰ্ক কৰে
