এই পৃষ্ঠাটোৰ বৈধকৰণ হৈছে
জীৱন-সঙ্গীত।
(কবি Longfellow ৰ A Psalm of Life নামে ইংৰাজী কবিতাৰ ভাগনি)
১
শোকৰ কবিতা ৰচি, দুধাৰি চকুলো মচি,
নকবা জীৱন মিছা মিশাৰ সপোন;
অসাৰ সংসাৰ ভাই, ইয়াত সকাম নাই,
মোহময় মায়াময় সকলো মাথোন।
২
পুত্ৰ কন্যা পৰিবাৰ কোন তযু, তুমি কাৰ?
বুলি হেৰা অবাবত নকৰাঁ বেজাৰ;
কল-ঘুমটীয়া হই, আতমা যে আছে বই,
জানিবা মৰণ নাই এই আতমাৰ।
৩
অস্থায়ী মানৱ দেহা, কৰিম দুদিন বেহা,
ফুৰিম দুদিন মাথোঁ সংসাৰ হাটত;
দুদিনৰ অন্ত হলে, আয়ুস ঢুকাই গলে,
সুন্দৰ দেহাৰ ঠাই শেষ শ্মশানত।
৪
চকু কাণ নাক যাব, হাড় ছাল নাশ পাব,
মাটিৰ মানুহ তুমি মাটিত মিলিবা;
অবিনাশী নিত্য ধন, অমৰণ অভগন,
অনন্ত উন্নতিশীল আতমা জানিবা।
