এই পৃষ্ঠাটোৰ মুদ্ৰণ সংশোধন কৰা হৈছে
[২১]
নতুন টঙালি কমৰত বান্ধি
বহিছা সুসাজন সাজি।
নতুন ভাবেৰে চকুৰ পছাৰে
বৰষি মিছিকিয়া হাঁহি
নব বৰষৰ অতি মনোহৰ
বজালা সুললিত বাঁহী।
নতুন তানেৰে সজীৱ প্ৰাণেৰে
গালাহি সুমধুৰ গান;
নতুন গানত বাজিল কানত
শান্তিৰ সুশীতল তান।
এই যুবকেই আমালোকৰ লাচিত পণ্ডিতৰ পুতেক লাবণ্য লাল লহকৰ। এওঁৰ বয়স দুবছৰ পাৰ নৌহওঁতেই পণ্ডিত পৰলোক প্ৰাপ্ত হয়। তেতিয়াৰে পৰা নানা আলই-অথনিত পবিও মাকে কোনোমতে এওঁক প্ৰতি পালন কৰে। অলপ বুজন হওঁতে নৌহওঁতেই ছয় বছৰ বয়সত নিম্ন-প্ৰাইমাৰী স্কুলত, খুড়াক সান্তৰামে এওঁৰ নাম লগাই দিয়ে। আৰু চোকা বুদ্ধিৰ বলত দহ বছৰত ভৰি দিওঁতেই এওঁ চতুৰ্থ শ্ৰেণীলৈকে প্ৰমোচন পায়,
