এই পৃষ্ঠাটোৰ বৈধকৰণ হৈছে
(ঘ)
পুৰুষৰ গীত আজি বিহ যেন লাগে!
ভালকে নালাগে সুৰ তেনে সঙ্গীতৰ;
গোৱাঁ, পখি! গোৱাঁ তুমি সুৱলা মাতেৰে,
পৰাণ জুড়াওঁ শুনি গীত স্বভাবৰ॥
কোনে আৰু গাব গীত? শঙ্কৰ মাধৱ
অনন্ত কন্দলী ৰাম নাই আসামত?
আসাম-সঙ্গীত-বন নীৰবতা-ভৰি।
এৰিলে ই মৰ্ত্ত্যভূমি কালৰ হাতত॥
কোনে আৰু, হায়! পখি! সঙ্গীতৰ সুৰ
ধৰিব সুৱলা তানে? ন ন গাঁথণীৰে
কোনেনো গাঁথিব গান সুৱলা মধুৰ?
ঢালিব কানত কোনে সুধা ধীৰে ধীৰে?
শঙ্কৰ মাধৱ নাই, নাই আজি ৰাম!
নাই আজি সেই গীত জুড়াব পৰাণ॥
