এই পৃষ্ঠাটোৰ বৈধকৰণ হৈছে
ক’লা ডাৱৰত, সছা, জ্বিলিকে বিজুলি,
ওপৰে জ্বিলিকে চন্দ্ৰ তৰা দিবাকৰ,
জ্বিলিকে যি দৰে কিন্তু ছবি বন্ধুত্বৰ,
একো নাই জগতত সিৰূপে উজ্জ্বলি।
যেনে জ্বিলিকনি, আহা! বন্ধুত্ব! তোমাৰ।
কি জানিব পাৰে সিটে, যিটে পোৱা নাই?
কোনে কয় জ্বিলিকনি উজ্জ্বল হীৰাৰ
তোমাতো অধিক? হায়! নাভাবি নাচাই?
আছে “কহিনুৰ” সছা উজ্জ্বলি ৰাণীৰ*
ৰত্নময় মুকুটত, কিন্তু যেনে কই
জ্বিলিকিছে ছবিখনি, বন্ধুত্ব তোমাৰ
বান্ধৱৰ হৃদয়ত,—নাই তেনেকই॥
বন্ধুত্ব! তোমাৰ মুৰ্ত্তি শান্তিৰ আধাৰ,
নিৰ্ম্মল পুখুৰি তুমি অনন্ত শান্তিৰ॥
