পৃষ্ঠা:মালচ.djvu/৬৫

ৱিকিউৎসৰ পৰা
Jump to navigation Jump to search
এই পৃষ্ঠাটোৰ বৈধকৰণ কৰা হৈছে


শত্ৰু।

বাঘ, ঘোঙ সাপ, আৰু ভালুক বনত,
শিহু ঘৰিয়াল আদি দূৰ সাগৰৰ,
এনেকুৱা বহু শত্ৰু আছে মানবৰ,
আছে সছা, কিন্তু সদা থাকে আঁতৰত॥
যেনুৱা দাৰুণ শত্ৰু আছে শৰীৰত
(কাম ক্ৰোধ লোভ মোহ ঘৃণা অহঙ্কাৰ)
তেনেকুৱা আৰু শত্ৰু নাইযে আমাৰ,
মহা শত্ৰু ছয় ৰিপু নৰ-জীৱনত॥
সাতোটা ৰথীয়ে বেৰি “ভাৰত যুদ্ধত,”
যিৰূপে কৰিলে বধ অভিমন্যু বীৰ
ছটা শতুৰুৱে তেনে নৰ-জীৱনত
খুছি-কাটি মানৱক কৰিছে অস্থিৰ॥
বাঘ ঘোঙ শক্ৰ,—কিন্তু থাকে আঁতৰত
মুৰ্ত্তিমান ছয় ৰিপু নৰৰ দেহত॥