পৃষ্ঠা:মালচ.djvu/১২৭

ৱিকিউৎসৰ পৰা
Jump to navigation Jump to search
এই পৃষ্ঠাটোৰ বৈধকৰণ কৰা হৈছে


* * *
(খ)

হৃদয়ৰ বেগ, হায়! ঘূৰাব নোৱাৰি
দীনহীন বেশে আজি মাগিছোঁ বিদায়!
আশীৰ্ব্বাদ দিয়া, আই! হিয়া উদঙ্গাই,
কান্দো যেন সিঠাইতো তোমাক সুমৰি॥
কি সুখত, কি দুখত, শোকত মগন,
থাকোঁ যেনে অৱস্থাতে, তেনুৱা কালত
তযু মূৰ্ত্তি অঁকা যেন থাকে হৃদয়ত,
নুভূলো ধিয়াঁব যেন তোমাৰ চৰণ॥
স্বদেশী, বিদেশী কিম্বা অচিনাকী স’তে
য’তে যেনেকৈয়ে থাকোঁ, নুভূলিবা, আই!
অন্তৰৰ পৰা মোক নিদিবা পেলাই,
সুমৰিবা মাজে মাজে থাকোঁ যেয়ে য’তে॥
দীনহীন কবি মই পগলা ভাবৰ,
নকৰিবা সেই বুলি মনৰো আঁতৰ॥