পৃষ্ঠা:মালচ.djvu/১১৭

ৱিকিউৎসৰ পৰা
Jump to navigation Jump to search
এই পৃষ্ঠাটোৰ বৈধকৰণ কৰা হৈছে


নতুন বছৰ।

দুৰ্ভগাৰ দৰে আছে বহু দুৰ্ভগীয়া,
বহু দুৰ্ভাগিনী আছে, জ্বলিছে অন্তৰ!
ঢালি দিয়াঁ শান্তি আাৰু হাঁহিৰ কিৰণ,
গুছি য’ক হৃদয়ৰ অশান্তি-ডাৱৰ॥
জগতবাসীৰ হিয়া ভৰোক উলাহে
সুখ সন্তোষেৰে ভৰা হওক জগত,
আনন্দৰ ঢউ যেন খেলে সকলোতে,
চকুলো নোলায় যেন কাৰো নয়নত॥
যি টুকিলো চকুপানী, যি কান্দিলো, হ’ল!
যি পুৰিলে(সেয়ে হ’ল), জুয়ে অন্তৰৰ!!
আৰু যেন এনে ক্লেশ নঘটে ভাগ্যত
এয়েই প্ৰাৰ্থনা মাথোঁ দগ্ধ হৃদয়ৰ!!
এই আশা, ই কামনা কৰিবা পূৰণ,
এয়েই গোহাৰী মোৰ, ধৰিছোঁ চৰণ॥