এই পৃষ্ঠাটোৰ বৈধকৰণ হৈছে
২২
মঞ্জৰী
(৬৩)
যৌৱনৰ মহাভাৰ ভাঙিব নোৱাৰি
ইনাই বিনাই কেৱে কান্দে বেজাৰত;
কাতৰ বুকুৰ তেজ খাই নিত্য পাষাণীয়ে
কৰিছে বিহেৰে ভৰা সুন্দৰ জগত।
(৬৪)
অনিত্য সংসাৰ তেন্তে জানিছা নিজেই
পাৰ্থিব সুখৰ সুখ তীব্ৰ হলাহল;
শৰতৰ সেই সুৰো পাহৰি পেলোৱা সখি
নাই তাত মউ-ৰস, নাই পৰিমল।
(৬৫)
ময়ো আজি বুজো সখি মোৰো আছে প্ৰাণ
বিধাতাৰ শ্ৰেষ্ঠ-দান লম সমাদৰি;
কল্পনা কুসুম ফুলি কল্পনাতে জহি গ'ল
তাৰ কথা কোনো কালে নাথাকো সুৱঁৰি।