এই পৃষ্ঠাটোৰ বৈধকৰণ হৈছে
১২৪
ভক্তি-ৰত্নাৱলী
যতেক নিন্দিত লোক আছে নিৰন্তৰ।
তাহাৰো নিন্দিত হৰি-বিমুখ পামৰ॥৫৭৮॥
বিদুৰ বচনে লৈয়ো ইহাৰ প্ৰমাণ।
বুলিলা বিদুৰ মৈত্ৰেয়ৰ বিদ্যমান॥
শুনিয়ো মৈত্ৰেয় মোৰ যেন অভিমত।
যতেক শোচনা আছে ইটো জগতত॥৫৭৯॥
সি সবো তাহাক প্ৰতি কৰয় ক্ৰন্দন।
নজানিয়া কৃষ্ণ-কথা নুশুনি যিজন॥
সিও বোলে মোক প্ৰতি নকান্দ সদায়।
নজানোহো আমি একো শাস্ত্ৰ অভিপ্ৰায়॥৫৮০॥
তুমি আমি দুইয়ে আহা কান্দো তাক প্ৰতি।
সবে শাস্ত্ৰ তাতপৰ্য্য জানিয়া সম্প্ৰতি॥
তথাপি কৃষ্ণৰ কথা নকৰে শ্ৰৱণ।
মিছাত পঢ়িলে মাত্ৰ শাস্ত্ৰ সিটো জন॥৫৮১॥
সমস্তে শাস্ত্ৰৰ সাৰ মাধৱৰ কথা।
তাহাক নুশুনি জন্ম কৰিলেক বৃথা॥
অনেক জন্মৰ দুৰ্ব্বাসনা আছে তাৰ।
তাতেসে কৰিলে কালে আয়ুক সংহাৰ॥৫৮২॥
বাক্য মন শৰীৰৰ ব্যাপাৰ সকল।
হৰি-কথা বিনে তাৰ সকলে বিফল॥
তাত পৰে জানিবা নাহিকে আত্মঘাতী।
তাক লাগি ময়ো অনুশৌচ কৰো অতি॥৫৮৩॥
