এই পৃষ্ঠাটোৰ বৈধকৰণ হৈছে
(৮)
এহি বুলি মৌন ভৈলা দেৱ ব্ৰহ্মাহৰ।
তাসম্বাক সম্বুধি মাতন্ত দামোদৰ॥
শুনা ব্ৰহ্মা শুনা শিব শুনা দেবগণ।
কহিবে নলাগে মই জানো প্ৰয়োজন॥
তোমাৰ কাৰ্য্যক মোৰ লাগে কৰিবাক।
কিন্তু এক কথা কহো শুনিয়োক তাক॥
দশৰথ ঘৰে মই জনম ধৰিবো।
পিতৃ বাক্য ধৰি ঘোৰ বনত চলিবো॥
তহিত সীতাক হৰি নিবেক ৰাৱণে।
ভালুক বানৰ হৈবা সবে দেৱগণে॥
তোৰাক সহায় লই ৰাৱণক মাৰি।
সাগৰত সেতু বান্ধি সীতাক উদ্ধাৰি॥
তেবেসে খণ্ডিবে পৃথিবীৰ মহা ভাৰ।
দুষ্টক বধিয়া সন্ত কৰিবো উদ্ধাৰ॥
এহি বুলি অন্তৰ্ধ্যান ভৈলা ভগবান।
দেব গণ চলি গৈলা আপোনাৰ স্থান॥
আত অনন্তৰে কথা শুনা মন কৰি।
মনে আলোচিয়া সাৰ কৰিলন্ত হৰি॥
মই দশৰথ ঘৰে জন্ম ধৰো যাই।
কোনে হুইবে গই মোৰ লগৰ সহাই॥
জিজ্ঞাসিয়া মনে পাচে পালে নাৰায়ণে।
হৌক জন্ম মহালক্ষী বসুন্ধৰী স্থানে॥
