পৃষ্ঠা:নিবেদন.djvu/৪১

ৱিকিউৎসৰ পৰা
এই পৃষ্ঠাটোৰ বৈধকৰণ হৈছে
বিশ্বৰাজ্য ।



বিশ্বৰাজ্য।

মানুহ বুলিলে সকলো একেই
 সকলো আমাৰ ভাই,
জন্তুৰ লগতো ভাই ভাব কৰা
 কোনেনো দিব শিকাই?
গছ-গছনিকো মৰম কৰিব
 কেতিয়া জানিম গই,
বিশ্বৰ মাজত পৰ ভাব আৰু
 গুচিব কাহানিকই?

মনৰ ভাব ভাষাই মাথোন
 বাহিৰে প্ৰকাশ কৰে,
কেতিয়া ধৰাই বহু ভাষা এৰি
 চলিব একেটিৰে?
যিটি ভাষা আমি বুজিম ঠাৰতে
 নেলাগে মুখেৰে ক’ব,
গছ-গছনিৰো মনৰ ভাবটি
 ঠাৰতে প্ৰকাশ হ’ব।