এই পৃষ্ঠাটোৰ বৈধকৰণ হৈছে
বৰ্ষাৰণ্যৰ সুগৰী ঘাট
শেষ এন্ধাৰত জয়পুৰৰ কুঁৱলী ফালি
সেউজ সুৰংগটোৰে গৈ পোৱা ঘাটটোত পানী খাবলৈ
তেতিয়া সুগৰী নাছিল
সুপ্ৰাচীন সংগীত এটাৰে আমাক আদৰিবলৈ পানীধাৰ ৰৈ আছিল
আমাৰ হাতৰ স্পৰ্শত বৈ যাবলৈ
হাবিতলীয়া ফুল হৈ বেলিটো ফুলোতে তোমাৰ মুখত কনকচম্পা
নাচনী নৈৰ খামুচীয়া কঁকালটো তোমাৰেই কিজানি
কলাফুল চিকুটা সোঁত বাঘে চেলেকা পানী
মোৰ বুকত বিনাই থকা দুৰ্বিনীত বাঘটো চেঁচাত গলিল
সুগৰী পহুৰ সুৱাগুৰি তোলা গোন্ধ
অৰণ্যৰ কোলাহলো ইমান নিৰ্জন
তোমাৰ ঢাকনি তলৰ প্ৰেমতকৈয়ো
পাহাৰটোক শিতান কৰি সেই দিনা পাহৰি থাকিলোঁ
ধূলিয়ৰি নগৰৰ ব্যস্ত আলাপ
তিতিলোঁ সমানে বৰ্ষাৰণ্যৰ বৰষুণ আৰু অব্যক্ত প্ৰেমত
পাতৰ আগেৰে পানী
তিতা মাটিত সেই আদিম সংগীত
আইৰ কোলাৰ গীত
আৰু আত্মাৰ নিচুকনি
(২০০১)
তটিনী তীৰৰ খেলা//৪৯
