এই পৃষ্ঠাটোৰ বৈধকৰণ হৈছে
(৩৯)
জিৰনি।
১৮
জিৰনি জিৰনি বুলি ব্যাকুল সংসাৰ,
কত আছে প্ৰকৃত জিনি
যেনি চোঁৱা সকলোতে জিৰনিৰ শেষ
অশান্তিৰ চিৰ উদগনি।
অসীম জগত যাক থিৰ যেন দেখি
বোলা তুমি জিৰনি আধাৰ
কলীয়া ভোমোৰাহৈ পদুম সূৰ্য্যৰ
চৌপাশে কৰিছে বিহাৰ।
অপাৰ নক্ষত্ৰ পুঞ্জ আকাশৰ গাত
নাই তাৰো অকনো জিৰণি,
ইটিক মাজতলৈ ঘুৰিছে সিটিয়ে
পৰস্পৰ কৰি টনাটনি।
চকুৰ আগত তুমি থিৰ দেখা যাক
পৃথিবীৰ গতিত অস্থিৰ,
কাৰ্য্যত বিভোল বিশ্ব ঘুৰিছে সততে,
অবিৰাম অথিৰ অবিৰ।
চকুমন উভয়তে সততে জিলিকে
লাগি থকা কামৰ ছবিটি,
জিৰণিৰ কেন্দ্ৰ কত নেপোৱা বিছাৰি
যেনি চোঁৱা অবাচিত গতি।
