এই পৃষ্ঠাটোৰ বৈধকৰণ হৈছে
পুষ্পসুন্দৰী
বহিছে ফুলৰ সভা
সভানেত্ৰী সৰগৰ ফুল পাৰিজাত
লাগে সমাধান এটি
কোননো ফুলৰ ৰাণী
আলোচ্য বিষয়বস্তু হ’বযে সভাত।
গোলাপে টিপতে ক'লে
মই বিশ্বসুন্দৰী, প্ৰমাণপত্ৰ আছে
ৰাণীৰ মুকুটটোও
মাথো মোৰ মূৰতহে খাপ খাই বহে
দেখি মনুষ্যপ্ৰাণে ঘূৰি ঘূৰি নাচে
সমকক্ষ নেজানো মোৰ কোননো আছে!
শুনি লৈ শেৱালি উঠিল জাঙুৰ খাই
হ'লেও মই এধানি
শুভ্ৰ, সতেজ মই, গুৰিতে ৰঙীণ হৈ
দোকমোকালিতে উঠি
আপ্লুত কৰো মন
সজাও দলিচাখন নিয়ঁৰকেলৈ
নকৰিবা আৰু হৈ চৈ।
লাজুকী ৰজনীগন্ধাই ওৰণী দাঙি
মাৰিলে মিচিকি হাঁহি
দ্বন্দ্ব নালাগে ভাল, মিলনৰ গীত গাওঁ
সেয়ে ৰাতি ফুলো মই
ফুলশয্যাৰ প্ৰতীক হৈ
দুটি মন এটি কৰি এৰো বিছনাতে থৈ
নাযায় সুগন্ধি অতীত পাহৰণি হৈ।
৩৬•এজন ডাক্তৰৰ কবিতা
