এই পৃষ্ঠাটোৰ বৈধকৰণ হৈছে
১৭২
উদ্যোগ পৰ্ব্ব।
উৰ্দ্ধ মুখ কৰি নাসিকাত দিয়া দৃষ্টি।
পুবক সম্মুখ পশ্চিমেক দিয়া পিঠি॥৮০০
যদি আদিত্যৰ তাপ নিজ পিথি লাগে।
তেবেসে কৰ্ণৰ সিটো সমাধিত ভাগে॥
কুন্তী দেখে কৰ্ণ আছে সূৰ্য্যক ধিয়াই।
বাত চাই তথাতে ৰহিল কুন্তী আই॥৮০১
এহিমতে তথাতে কুন্তীয়ে ৰহি আছে।
মধ্যাহ্ন বেলাত সূৰ্য্য নিবৰ্ত্তিল পাচে॥
আদিত্যৰ তাপ যাই পিঠিত লাগিল।
তেবেসে কৰ্ণৰ সিটো সমাধি ভাগিল॥৮০২
সমাধি ভাগিয়া কৰ্ণে ফিৰি চাহে পাচে।
দেখে কুন্তী গোসানী আগতে ৰহি আছে॥
দেখি কৰ্ণ উঠিলেক পৰম সাদৰে।
কুন্তীৰ আগত যুৰিলন্ত যোৰকৰে॥৮০৩
কৰ্ণে বোলে ৰাজমাতা শুনিয়ো বচন।
কত ভাগ্যে ভৈলোহো তোমাক দৰিশন॥
অধিৰথি পুত্ৰ মই ৰাধাৰ কুমাৰ।
হেৰা নমস্কাৰ কৰো চৰণে তোমাৰ॥৮০৪
তযু দৰশনে মোৰ পুৰুষৰো ভাগে।
কি কাৰ্য্যে আসিছা তুমি কহিয়োক আগে॥
