এই পৃষ্ঠাটোৰ বৈধকৰণ হৈছে
১৬৮
উদ্যোগ পৰ্ব্ব।
পাণ্ডব আসিব সাত দিনৰ ভিতৰ।
কুৰুক্ষেত্ৰে সমৰ মিলিবে গুৰুতৰ॥৭৮০
সঞ্জয় বদতি কথা শুনিয়ো শ্ৰবণে।
ভাল বুলি কৃষ্ণক নমিলা বীৰ কৰ্ণে॥
পাণ্ডবৰ ঠানক চলিলা দামোদৰ।
মনে দুঃখে কৰ্ণ আসি পশিলা নগৰ॥৭৮১
বৈসম্পায়ন বদতি শুনিয়ো নৰেশ্বৰ।
আত অনন্তৰে কথা শুনা নিৰন্তৰ॥
কৃষ্ণো গৈলা তোমাৰ প্ৰপিতামহী কুন্তী।
কান্দন্তে আছন্ত দেবী মহা শোকে আতি॥৭৮২
সেহি সময়তে যাই বিদুৰ মিলিল।
কুন্তীৰ আগত কথা কহিবে লাগিল॥
শুনা ৰাজ মাতা কুন্তী বচন আমাৰ।
শ্ৰীমদে অন্ধ দোৰ্য্যোধন দুৰাচাৰ॥৭৮৩
যুগুত বচন বুলিলন্ত যদুপতি।
অৰ্দ্ধৰাজ্য খুজিলন্ত পাণ্ডৱক প্ৰতি॥
আমিয়ো বুলিলো তাক সময়ন্তি মনে।
কাণতো নলৈলে তাক ৰাজা দুৰ্যোধনে॥৭৮৪
বিনাযুদ্ধে পাণ্ডৱক ৰাজ্য নেদে জানি।
তেধেসে উভতি গৈল প্ৰভু চক্ৰপাণি॥
