এই পৃষ্ঠাটোৰ বৈধকৰণ হৈছে
৯০
আদি চৰিত
দক্ষিণে বহন্ত তীৰ্থৰাজ ব্ৰহ্মপুত্ৰ।
দক্ষিণপাট নামে তৈতে নিৰ্ম্মিলেক সত্ৰ॥৮৯০
চাৰিদিন সেহি সত্ৰে থাকিয়া ঈশ্বৰ।
ভালৰূপে সত্ৰখান নিৰ্ম্মিলা শঙ্কৰ।
দামোদৰ দেৱ তাতে অধিকাৰী কৈলা।
তাহাঙ্ক চাহিযা গুৰু বচন বুলিলা।
শঙ্কৰ বদতি কথা শুনা দামোদৰ।
সচঙ্গ কৰাইবা কৰ্ম্মী বিপ্ৰ নিৰন্তৰ।
আনো জাতি সকলক সচঙ্গক দিবা।
মোৰ বাক্যে দামোদৰ সত্ৰক পালিবা।
মলয়া বিজ্ঞান ভক্তি সঙ্ঘটি ব্ৰহ্মৰ।
এহি তিনি দিলো মই লৈয়ো দামোদৰ॥৮৯৫
এহি বুলি দামোদৰ সেহি সত্ৰে থৈলা।
ভক্তগণ সঙ্গে গুৰু তৈৰ হন্তে আইলা।
আজ্ঞা পায় দামোদৰ ৰহিলন্ত তৈত।
দামোদৰে সচঙ্গ কৰাইলা অসংখ্যাত।
তাঙ্ক থৈয়া তৈৰপৰা আসিলা ঈশ্বৰ।
একদিনা ৰৈলা গৈ শ্ৰীমন্ত শঙ্কৰ।
সেহি দিনা মোক প্ৰভু ভক্তিদান দিলা।
তদহং সঙ্ঘটি আৰু নিষ্কাম কেৱলা।
অনুগ্ৰহ কৰি গুৰু মোক ভক্তি দিলা।
নিজ গুৰু এক ভাগ শুকতিক লৈলা॥৯০০
