এই পৃষ্ঠাটোৰ মুদ্ৰণ সংশোধন কৰা হৈছে
ৰঘুনাথ দাস।
..........
আত্ম পৰিচয়।
সতানন্দ নামে সুদামৰ বংশ জাত।
শঙ্কৰক গুৰু মানি সিবেলা সাক্ষাত॥
শঙ্কৰে বোলয় সতানন্দ শুনা আৰ।
চাৰি পুত্ৰ আছে হেন শুনিছোঁ তোমাৰ॥
কিবা নাম তাসম্বাৰ কহিয়ো আমাত।
কহিলন্ত সতানন্দে কৰি প্ৰণিপাত॥
জয় কৃষ্ণ মহাকৃষ্ণ ত্ৰাহিকৃষ্ণ নাম।
কনিষ্ঠৰ শ্ৰীকৃষ্ণ নাম অনুপাম॥
শ্ৰীমন্ত শঙ্কৰে মাধৱক লাগি চাই।
বুলিলন্ত এহে বৰ ভকত মধাই॥
জয় কৃষ্ণ হেন নাম হুয়াছে যাহাৰ।
বিষয় সুখত স্পৃহা নাহিকয় তাৰ॥
ভকতি পথক লাগি যোগ্য হুয়াছয়।
শুনিলে সিপথ ধৰিবেক মহাশয়॥
শ্ৰীকৃষ্ণত তিনি গুণ যদ্যপি আছয়।
ৰজোগুণাধিক তাত জানিবা নিশ্চয়॥
শ্ৰী যশস্যাত চিত্ৰ হৈবেক সদাই।
দুহাঙ্কো লভিব মহন্তৰ ভাগ পাই॥
শুনা বৰ ভক্ত মোৰ উপদেশ ধৰা।
গৃহে যাই পুত্ৰ চাৰি হৰি ভক্ত কৰা॥
