এই পৃষ্ঠাটোৰ বৈধকৰণ হৈছে
৫৪
অজামিল উপাখ্যান
সিদ্ধৰ বচনে সম্পঞ্জিল আজি বুদ্ধি।
এতেকে জানিলো হৰি নামে মহৌষধি॥
পৰিহৰি বিষ্টা তুল্য বিষয়ক হন্তে।
ফুৰিবো গলত বান্ধি কৃষ্ণ নাম নিতে।॥
কিনো কৃপাময় দেৱ দেৱতাৰ দেৱ।
ব্ৰহ্মা মহেশ্বৰে জাক সদা কৰে সেৱ॥
যাৰ নাম লৈলে মাত্ৰ পাপীও নিস্তৰ।
হেনয় কৃষ্ণক কোটি কোটি নমস্কাৰ॥
কৃষ্ণে পিতা মাতা গতি মতি পতি প্ৰাণ।
কৃষ্ণৰ চৰণ বিনে নিচিন্তোহো আন॥
আজি ধৰি মনে মই কৰিলো নিশ্চয়।
গৈলো কৃষ্ণ চৰণত আপুনি বিক্ৰয়॥
লৈলোহো কৃষ্ণত এবে শৰণ সাক্ষাত।
নপৰোহো যেন পুনৰপি যাতনাত॥
কৃষ্ণৰেসে চৰণক চিন্তিবো সতত।
কৃষ্ণৰেসে নাম মই ৰাখিবো সতত॥
শুনিবো সদায়ে কৰ্ণে কৃষ্ণৰেসে কথা।
হৰি ভকতক নেত্ৰে দেখিবো সৰ্ব্বদা॥
হস্ত দুই কৰিবোহো কৃষ্ণৰেসে কাম।
সদা শিৰে কৰিবোহো কৃষ্ণক প্ৰণাম॥
