এই পৃষ্ঠাটোৰ বৈধকৰণ হৈছে
৪৩
অজামিল উপাখ্যান
নাহি কাল নিয়ম নামত একোবিধি।
যেই সেই মতে লৈলে নামে কৰে সিদ্ধি॥
হেনবা বুলিবা হৰি নাম সুমৰিলে।
পুত্ৰকেসে ডাক দিলে ইটো অজামিলে॥
কিমতে পাপত ভৈল শুদ্ধি অধমৰ।
শুন যম দুত তই ইহাৰ উত্তৰ॥
পুত্ৰ নাম ধৰি যদি উপহাস্য কৰি।
উচ্চৰে হেলাত যদি ৰাম কৃষ্ণ হৰি॥
তথাপি সমস্তে তাৰ পাপ ভৈল ক্ষয়।
নকৰিবি যম দুত ইহাত শংসয়॥
বুলিবি ব্ৰাহ্মণ ইটো মহা মন্দ বুদ্ধি।
অল্প নামে মাত্ৰ কেনে মতে হুইবে শুদ্ধি॥
আন প্ৰায়ছিতৰেহে ইসব ব্যবস্থা।
শুন অৰে হৰিৰ নামৰ ইটো কথা॥
উচ্চৰিলে হৰি নাম যিটো একবাৰ।
এৰিয়া সমস্তে পলাই পাতক তাহাৰ॥
সিংহৰ আগত যেন হৰিণৰ মুখে।
দুৰকো দুৰত পলাই নথাকয় সুখে॥
যি পাপৰ বিহিআছে যেন প্ৰায়ছিত।
সেহি পাপ হয়ে তপে জপে কদাচিত॥
