দেহি ঐ ! দূৰৈৰে গাঁৱেখনি

by জ্যোতিপ্ৰসাদ আগৰৱালা

দেহি ঐ ! দূৰৈৰে গাঁৱেখনি
            ধনে-ধানে পূৰে
                      নিমাত মৰিশালি হলে,
                                  আৱৰী মানে পাই
                                             ধনে-সোণে চুহি
                                                      পুৰি ছায়ে কৰি গ’ল৷

দেহি ঐ ! তাতে কোন গাভৰুৱে
            ৰূপৰ ফুল পিন্ধিছিল
                        কপৌফুল পিন্ধিছিল কোনে ?
                                  কোন ডেকাদেৱে
                                             হাঁহি কাষ চাপিছিল---
                                                     ওপৰে তিৰেবিৰায় জোনে৷

দেহি ঐ ! তাতে ক’ৰে সখিয়তী
            পৰি ডালে-পাতে
                      মাতিছিল সখী ঐ বুলি,
                                  তাতে কোন ৰূপহীয়ে
                                             নৈৰে ঘাটতে
                                                     বহি মেলাইছিলে চুলি?
দেহি ঐ ! দূৰৈৰ গাঁৱেখনি
            আছিল জকেমকি
                      চিন-চাব এটিকে নাই,
                                  হলে গহীন হাবি
                                            বাঘে-ঘোঙে ভৰি
                                                     হিয়া ছাঁতে কৰি যায়৷৷