দেউতা মই আজি সপোনত

ৱিকিউৎসৰ পৰা
নেভিগেশ্যনলৈ যাওক সন্ধানলৈ যাওক


দেউতা মই আজি সপোনত
            দেখিলোঁ এটা গান
            তুমি যে লিখা সৰু গান
                        তাতোকে’ অকণমান৷

মোৰ দৰেই তাৰো গাতো
            কাপোৰ কানি নাই
            চোলা পিন্ধিলে সিও হেনো বৰ বেয়া পায়৷

তুমি যে দিছা মাজ কোঠালিত তানপুৰাটো থৈ
                        তাৰ তলতে
            জুনুকা পিন্ধি নাচি আছিল
                        ঠুমুক্‌ ঠুমুক্‌ কৈ৷

মোক দেখি সি খং কৰি গৈ
                        হামণিটোত সোমাল
            নিগনি খোচাদি খুচি আছিলোঁ,
                        তেওঁ গানটো নোলাল৷৷