ধূলিৰ বাটেৰে যোৱা সুন্দৰৰ

ৱিকিউৎসৰ পৰা
নেভিগেশ্যনলৈ যাওক সন্ধানলৈ যাওক


ধূলিৰ বাটেৰে, যোৱা সুন্দৰৰ
            পিছে পিছে, কোন যাবি
            লগে লগে কোন যাবি?
            চকুপানীৰ গাঁও পাবি৷

যন্ত্ৰণা-বেদনা ব্যথাৰ
            মুকুতা ধুনীয়া ৰূপ চাবি
            চকুপানীৰ গাঁও পাবি৷

তাত দীপ্তা আশাই
            নিৰাশাৰে যুঁজে
তাত নতুন গানৰ
            আচল অৰ্থ বুজে
তাত গাভৰুৰ খোজে খোজে
                        পোহৰ পদুম ফুলে,
তাত, ফালি চিৰি
প্ৰকাশ পাবলৈ
বিকাশ লবলৈ----
            গাঁৱৰ ডেকাৰ
                        চকু দুটাত
                        জুই আঙনি জ্বলে৷

সুন্দৰে তাত বাহৰ পাতি আছে
গাঁৱৰ ডেকা-ডেকেৰীয়ে
            আগচোতালত
            পাছ চোতালত
                        নতুন দিনৰ
                                    নতুন বিহু নাচে৷

সুন্দৰে চাই আপোন মনে
            হাঁহি হাঁহি
            অময়া মৰম যাচে৷৷