আজি নৱ সুৰ লয় মান

ৱিকিউৎসৰ পৰা
Jump to navigation Jump to search
আজি নৱ সুৰ লয় মান
লেখক জ্যোতিপ্ৰসাদ আগৰৱালা
Wikimedia-logo.svg আৰু চাওক প্ৰবন্ধ.
জ্যোতি সংগীত

আজি নৱ সুৰ লয় মান মাত্ৰা

        জাগ্ৰত জনতাৰ আলোক যাত্ৰা ৷


            জনতাৰ ভোক জাগে

            জনতাৰ শোক জাগে

            বাসনা কামনা যত জাগে...

                    জাগে....... জাগে

            বেলিৰ উদয় কোনে

                ৰুধিব পাৰে

            মানুহৰ প্ৰতাৰণাৰে ???


আশা জাগে

ভাষা জাগে

গান জাগে

সুৰ জাগে

            দুৰ্নিবাৰ জাগে ছন্দ

        জাগে মহামহত্বৰ প্ৰমুক্ত গন্ধ

        জাগে জনজীৱনৰ

            জন মহাপ্ৰকাশৰ

                মহা হাঁহাকাৰ

        জনকম্প জাগে

        ভূমিকম্প জাগে

        আলোককম্প জাগে

            পুৰণিক ভাঙি চিঙি

                কৰি ছাৰখাৰ

নবোন্মেষৰে জাগে

        মনীষা প্ৰতিভা মেধা

            বিপ্লৱ লেখনী লৈ

        জুই চিয়াঁহীৰে লিখে কবিতাৰ হাৰ

            নতুন তন্ত্ৰ ৰচে

                গঢ়িবলে’ জন চৰকাৰ ৷৷