মোৰ কবিতা শুনিবি

ৱিকিউৎসৰ পৰা
Jump to navigation Jump to search
মোৰ কবিতা শুনিবি
লেখক জ্যোতিপ্ৰসাদ আগৰৱালা
Wikimedia-logo.svg আৰু চাওক প্ৰবন্ধ.
জ্যোতি সংগীত


মোৰ কবিতা শুনিবি কোন কোনে?
          শুনিলে শুনিবি মনে মনে৷

মোৰ কবিতাত বিজয়ীৰ কথা
          দস্যু বীৰত্বৰ
                   নাই কোৱা মহামাৰ
                   প্ৰাণ লোৱা অজলাৰ৷

মোৰ কবিতাৰ
          ছন্দত নাবাজে
                   মূঢ় ধনীৰ
                          ধনৰ ঝণৎকাৰ
                                   অন্ধ অহঙ্কাৰ৷
মোৰ কবিতাত
          জাগে হাঁহাকাৰ
          অপ্ৰকাশৰ মহাবেদনাৰ
       মোৰ কবিতাই ভাঙে কাৰাগাৰ
                   লঙ্ঘিবলে’
                          অত্যাচাৰ দুস্তৰ পাৰাবাৰ৷
       মোৰ কবিতাই, পুৰণিক ভাঙি
                          সাজিব খুজিছে
                                   নতুন দিনৰ
                                          নৱতম সম্ভাৰ
       নৱজীৱনৰ নৱশস্যৰ সোণোৱালী
                                          উপচাৰ৷৷