পৰ্বততে ফুলিলে ৰঙানোকৈ

by জ্যোতিপ্ৰসাদ আগৰৱালা

পৰ্বততে ফুলিলে ৰঙানোকৈ ফুলে কলি
          ৰেণুৰে বোলালি তই কুমলীয়া হাত ৷
অ’ ভৈয়ামৰ সোণামুৱা কিনো কৰ গুণি গাথি
          লেখি লেখি সেউজীয়া পাত ৷

                   বনে মইনা সেউজীয়া,
                   গছে মইনা সেউজীয়া,
                   পাতে মইনা সেউজীয়া পাত,

মইনা চৰাইটিয়ে গছৰ ডালে পাতে পৰি
                   মাতিছে মিঠা মিঠা মাত৷
আমনে জিমনেকৈ
          থাকনো তই কিয় ঐ
                   গালতেনো দিয় কিয় হাত?
                   হাঁহ অ’ মোৰ মইনা
                             হাঁহ অ’ হাঁহ৷

ভালেনো পাওঁ চাবলৈ,
                   ৰঙা ওঁঠৰ হাঁহিৰ সতে
                   জিকিমিকি দুয়ো পাৰি দাঁত৷৷