প্ৰথম খণ্ড: চতুৰ্ব্বিংশতি অৱতাৰ

ৱিকিউৎসৰ পৰা
নেভিগেশ্যনলৈ যাওক সন্ধানলৈ যাওক

প্ৰথম খণ্ড

চতুৰ্ব্বিংশতি অৱতাৰ

প্ৰথম কীৰ্ত্তন


!!ঘোষা!!

জয় হৰি গোবিন্দ নাৰায়ন ৰাম কেশৱ হৰি!

ৰাম ৰাম কেশৱ হৰি!!১!!

পদ!!

প্ৰথমে প্ৰনামো ব্ৰহ্মৰূপী সনাতন!

সৰ্ব্ব অৱতাৰৰ কাৰন নাৰায়ণ!!

তযু নাভিকমলত ব্ৰহ্মা ভৈলা জাত!

যুগে যুগে অৱতাৰ ধৰা অসংখ্যাত!!১!!

মৎস্যৰূপে অৱতাৰ ভৈলা প্ৰথমত!

উদ্ধাৰিলা চাৰি বেদ প্ৰলয়জলত!!

সত্যব্ৰত ৰাজাক দেখাইলা নিজ মায়া!

নধৰিলা সমুদ্ৰে তোহ্মাৰ মৎস্যকায়া!!২!!

কুৰ্ম্ম অৱতাৰ ভৈলা ক্ষীৰোদধি তীৰে!

লক্ষ প্ৰহৰৰ পন্থ জুড়িলা শৰীৰে!!

কৰিলেক পৰি স্তুতি সুৰাসুৰ নাগে!

ধৰিলা মন্দৰ গিৰি প্ৰভু পৃস্ঠভাগে!!৩!!

দিব্য যজ্ঞবাৰাহ স্ৱৰূপে ভৈলা তুমি!

লীলায়ে দন্তৰ অগ্ৰে উদ্ধৰিলা ভুমি!!

তোমাক কৰিলে যুদ্ধ হিৰন্যাক্ষ বীৰি!

অপ্ৰয়াসে দৈত্যক মাৰিলা দান্তে ছিড়ি!!৪!!

আদি দৈত্য হিৰন্যকশিপু বলিয়াৰ!

নৰসিংহ ৰূপে হিয়া বিদাৰিলা তাৰ!!

কৰিলা নিৰ্ভয় পাইলা ত্ৰিদশে উল্লাস!

ভক্ত প্ৰহ্লাদক প্ৰভু কৰিলা আস্ৱাস!!৫!!

বামন স্ৱৰূপে অদিতিৰ বাক্য পালি!

ইন্দ্ৰক স্থাপিলা ছলে বলিক নিকালি!!

ত্ৰৈলোক্যক আক্ৰমিলা চৰনৰ গতি!

তযু পাদোদকে গঙ্গা ভৈলা উতপতি!!৬!!

!!দ্বিতীয় কীৰ্ত্তন!!


ঘোষা!!

যদুমনি যাদৱ যাদৱ যাদৱানন্দ হৰি!!২!!

পদ!!

ভৈলাহা পৰশুৰাম নামে অৱতাৰ!

প্ৰদক্ষিন কৰি ভুমি তিনি সাতবাৰ!!

ক্ষত্ৰিয়ক কাটিলা পৰসু কৰে ধৰি!

নিক্ষত্ৰিয় কৰিলা সমস্ত বসুন্ধৰী!!৭!!

শ্ৰীৰাম ৰূপে কৌশল্যাতে অৱতৰি!

বনবাস খপিলা পিতৃৰ বাক্য ধৰি!!

বিৰাধ কৱন্ধ মাৰীচৰ লৈলা প্ৰান!

খৰ দূষনক প্ৰভু কৰিলা নিৰ্য্যান!!৮!!

একপাট শৰে বালি সঙ্কলিলা জীৱ!

তোমাৰ প্ৰসাদে ৰাজা ভৈলন্ত সুগ্ৰীৱ!!

লঙ্কাত পশিলা সাগৰত বান্ধি সেতু!

বধিলা ৰাৱন সীতাহৰনৰ হেতু!!৯!!

মাৰিলা ৰণত আৰু ৰাক্ষস অনেক!

ভক্ত বিভীষনক কৰিলা অভিষেক!!

অগ্নিত পৰীক্ষা আনি কৰিলা সীতাক!

ব্ৰ্হ্মাদেৱে স্তুতিবাণী বুলিলা তোহ্মাক!! ১০!!

সম্বৰিলা সীতা দশৰথৰ বচনে!

অযোধ্যাক আসিলা সভাৰ্য্যে ৰঙ্গমনে!!

কৰিলাহা ৰাজ্য দশ হাজাৰ বৎসৰ!

লগে স্বৰ্গে নিলা সৱে অযোধ্যা নগৰ!!১১!!

ৰোহিণীত ভৈলা হলিৰাম অৱতাৰে!

দ্বিৱিদৰ প্ৰান লৈলা মুষ্টিৰ প্ৰহাৰে!!

প্ৰলম্ব মুষ্টিক ৰুক্ম দন্তবক্ৰ বীৰ!

লীলায়ে মাৰিয়া ভাৰ হৰিলা ভুমিৰ!!১২!!

বুদ্ধ অৱতাৰে বেদপন্থ কৰি ছন্ন!

বামানয় সাস্ত্ৰে মুহি আছা অজ্ঞজন!!

নিচিন্তে চৰন নাম নলৱে তোহ্মাৰ!

সদায়ে প্ৰমত্ত লোক পাষণ্ড় আচাৰ!!১৩!!

কলিৰ শেষত হৈবা কল্কি অৱতাৰ!

কাটি মাৰি ম্লেছক কৰিবা বুন্দামাৰ!!

সবাকু বধিবা বৌদ্ধগন যত আছে!

কলিৰ সেষত সত্য প্ৰবৰ্ত্তাইবা পাছে!!১৪!!


!! তৃতীয় কীৰ্ত্তন!!

ঘোষা!!

নৰহৰি গোবিন্দ গোবিন্দ গোবিন্দ ৰাম!!৩!!

সনতকুমাৰ অৱতাৰে তুমি হৰি!

ফুৰিলা দুষ্কৰ ব্ৰহ্মচৰ্য্য ব্ৰত ধৰি!!

পৃথু ৰাজা তোহ্মাত সুধিলা মহাজ্ঞান!

সমস্ত তত্ত্বক তুমি কৰিলা বাখ্যান!!১৫!!

ভৈলাহা নাৰদ ঋষি নামে অৱতাৰ!

পঞ্চৰাত্ৰ নামে তন্ত্ৰ কৰিলা প্ৰচাৰ!!

যাক আচৰিলে মহা মোক্ষ পদ পাই!

হৰিৰ কীৰ্ত্তন কৰি ফুৰা বীণা বাই!!১৬!!

ভৈলা অৱতাৰ আৰো নৰনাৰায়ণ!

কৰিলা দুস্কৰ তপ চিত্তৰ শোধন!!

তোহ্মাক মুহিবে কামদেৱে আইলা সাজি!

দৰ্পচুৰ কৰিলা ঊলতি গৈলা লাজি!!১৭!!

কপিল স্বৰূপে আৰো ভৈলা অৱতাৰ!

লুপ্ত ভৈলা জ্ঞান তাক কৰিলা প্ৰচাৰ!!

তোহ্মাৰ প্ৰসাদে যোগ জানি দেৱহুতি!

তোমাৰ চৰণ চিন্তি লভিলা মুকুতি!!১৮!!

দত্তাত্ৰেয় নামে ভৈলা অত্ৰিৰ তনয়!

পুছিলন্ত যোগ যদু অলৰ্ক হৈহয়!!

তিনিও ৰাজাত কৈলা যোগৰ যুগুতি!

তোহ্মাৰ প্ৰসাদে পাইল পৰম মুকুতি!!১৯!!

যজ্ঞ অৱতাৰে ভৈলা দেৱতাৰ ৰায়!

যামা নামে দেৱগণ লগত সহায়!!

স্ৱায়ম্ভুব মনুৰ দিনত তুমি হৰি!

ইটো ত্ৰিজগতক আছিলা ৰক্ষা কৰি!!২০!!

পুত্ৰ ভৈলা নাভিৰ ঋষভ নামে তুমি!

জড়যোগচৰ্য্যা কৰি পৰ্য্যটিলা ভুমি!!

পৰম জ্ঞানৰ পথ দেখাইলা আপুনি!

পৰম পদক পাৱে যাক জানি শুনি!!২১!!

অৰাজক ভৈল নষ্ট হোৱে সৱে প্ৰজা!

দেখি তুমি ভৈলা পৃথু নামে আদি ৰাজা!!

পৃথিবীক ধৰিয়া দুহিলা সৰ্ব্ব ৰস!

জগতকে ব্যাপিল তোহ্মাৰ মহাযশ!!২২!!

সাগৰ মথন্তে অমৃতৰ ঘট ধৰি!

ধন্বন্তৰি নামে অৱতাৰ ভৈলা হৰি!!

যত বৈদ্যসাস্ত্ৰচয় কৰিলা প্ৰকাশ!

যাহাক জানিলে হয় ব্যাধি বিনাশ!!২৩!!

ধৰিলাহা সংসাৰমোহিনী নাৰীৱেশ!

দুষ্ট দৈত্যগণক মুহিলা হৃষীকেশ!!

ভকত দেৱক পান কৰাইলা অমৃত!

তোমাৰ প্ৰসাদে ইন্দ্ৰ ভৈলা কৃতকৃত্য!!২৪!!


!! চতুৰ্থ কীৰ্ত্তন!!

ঘোষা!!

মাধৱ ৰাম হৰি হে যাদৱ ৰাম হৰি!!৪!!

প্দ!!

ব্যাস নামে ভৈলা সত্যৱতীৰ সন্ততি!

দেখিলাহা প্ৰজা ভৈল আতি অল্পমতি!!

কৰিলা অনেক শাখা চাৰিও বেদৰ!

পুৰাণ ভাৰত সাস্ত্ৰ নিৰ্ম্মিলা বিস্তৰ!!২৫!!

গজেন্দ্ৰক গিলে ঘোৰ গ্ৰাহে বলে ধৰি!

তোহ্মাত শৰণ লৈলে আৰ্ত্তনাদ কৰি!!

শুণ্ডে় মেঢ়াই পদ্মগোট উপৰক তুলি!

গজেন্দ্ৰে শৰণ লৈলা ত্ৰাহি হৰি বুলি!!২৬!!

শুনি শীঘ্ৰে চড়ি তুমি গৰূড়ৰ স্কন্ধে!

ভকতক ৰাখিবাক আসিলা প্ৰবন্ধে!!

গৰূড়ৰ নামি তুমি পৰম বিক্ৰমে!

শুণ্ডে ধৰি তৰক তুলিলা গ্ৰাহে সমে!!২৭!!

আথেবেথে চক্ৰে ছিঁড়িলাহা গ্ৰাহমুখ!

তোহ্মাৰ প্ৰসাদে গজেন্দ্ৰৰ গৈল দুঃখ!!

হস্তী গুচি তৈতে চতুৰ্ভুজ ৰূপ ভৈলা!

গলে বনমালা হাতে চাৰি অস্ত্ৰ লৈলা!!২৮!!

তোহ্মাক নমিলা গৈয়া দন্দয়তে পৰি!

পাৰিষদ হুয়া বৈকুণ্ঠক গৈলা লৰি!!

তযু পৰশনে গ্ৰাহে শাপক নিস্তৰি!

বিমানে স্বৰ্গক গৈলা দিব্য ৰূপ ধৰি!!২৯!!

হয়গ্ৰীৱ নামে আৰ ভৈলা অৱতাৰ!

তপ্ত সুৱৰ্ণৰ বৰ্ণ শৰীৰ তোহ্মাৰ!!

তোহ্মাৰ সুন্দৰ সিটো নাসিকাৰ হন্তে!

বাজ ভৈলা বেদগণ নিস্ৱাস কাঢ়ন্তে!!৩০!!

সপত্নী মাতৃৰ বাক্যে বিদাৰিল মন!

ধ্ৰূবে আসি আৰাধিলা তোহ্মাৰ চৰন!!

ত্ৰৈলোক্যৰ ওপৰে তাহাঙ্ক থৈলা থাপি!

গোধিকাৰ পুৰ্চ্ছভাগে দেখিয়ো অদ্যাপি!!৩১!!

দেৱে দৈত্যে আনিবেক নৱাৰে মন্দৰ!

অপ্ৰয়াষে আনি তুমি মথিলা সাগৰ!!

দানৱক যুজিলা দেৱৰ হুয়া ভিতি!

তোহ্মাৰ প্ৰসাদে ইন্দ্ৰে সাধিলা জয়তি!!৩২!!

কৃষ্ণৰ ৰহস্য জন্ম শুনা সৰ্ব্বজনে!

মোক্ষপদ সাধা আউৰ শ্ৰৱণ কীৰ্ত্তনে!!

কৃষ্ণৰ কিঙ্কৰে ভনে শঙ্কৰে সম্প্ৰতি!

বোলা হৰি হৰি পাপ যাউক অধুগতি!!৩৩!!

!! চতুৰ্ব্বিংশতি অৱতাৰ সমাপ্ত!!১!!