এই পৃষ্ঠাটোৰ বৈধকৰণ হৈছে
সকলো কবিয়ে দিনটোত এবাৰ উচুপে
সকলো কবিয়ে দুখৰ সৈতে
সহাৱস্থান কৰে, সেয়ে
সকলো কবিয়ে দিনটোত
এবাৰ নহয় এবাৰ উচুপে
যিদৰে দুপৰৰ কুলিৰ মাতত কঁপে
পদূলিৰ সেন্দুৰী আমজোপা
হিয়াভগা কেতেকীৰ কান্দোনে
ছেও ছেও কৰে নিশাৰ মৌনতা
আপুনি যদি কবি আপুনিও
দিনটোত এবাৰ হ’লেও উচুপে
মাত্ৰ পাৰ্থক্য
এইখিনিতে যে
দুখে আপোনালৈ
ভয় কৰে
কাৰণ শব্দৰ শংখ বজাই
আপুনি মানুহৰ ঘূমটি ভাঙিব জানে।
(পূৰ্বপ্ৰকাশঃ সাদিন, ২১/০৩/২০১৪)
এমুঠি বনকৰা কিংখাপ কবিতা।২৩
