এই পৃষ্ঠাটোৰ বৈধকৰণ হৈছে
ৰত্ন মণি।
⸻⸻
প্ৰথম অধ্যায়।
⸻⸻
সাধাৰণ ব্যাখ্যা।
⸻
ৰত্ন কি?
ৰম্ অৰ্থাৎ ৰমন ধাতুৰ পৰা ৰত্ন নামৰ উৎপত্তি। ধনাৰ্থী মানুহ বিলাকে যি বস্তুত্ অতিশয় মন অৰ্থাৎ আহ্লাদ প্ৰকাশ কৰে শব্দ শাস্ত্ৰ বিশাৰদ পণ্ডিত সকলে তাকে ৰত্ন বোলে।
মণি-ৰত্নৰে কোন কোন বিধ্। মন্-ই এই ধাতুৰ পৰা উক্ত নামৰ উৎপত্তি। অনেক স্থলত ৰত্ন মণিৰ অভেদ সংজ্ঞা; অৰ্থাৎ ৰত্নে মণি, — মণিয়ে ৰত্ন। কিন্তু স্থল বিশেষে ৰত্নৰ শ্ৰেষ্ঠ অংশকেই মণি বোলা যায়। যথা, — প্ৰাকৃতিক ভাষাত চক্ষুক ৰতন্ বোলে, আৰু তাৰ প্ৰধানাংশ (তৰাৰ মাঝত থকা ঘুৰনিয়া গুটী) যি-টী তাক মণি বোলে। এই দৰে অনেক বস্তুৰ সাৰাংশয়ে প্ৰায় মণি নামে অভিহিত। বস্তুতঃ মণি শ্ৰেষ্ঠৰো শ্ৰেষ্ঠ বস্তু।
