এই পৃষ্ঠাটোৰ বৈধকৰণ হৈছে
আইতাৰ যাবৰ বেলিকা
কোনে গালে সাজৰ পূৰবী?
মাৰ গ'ল স্বপ্নাচলত
সুৰুযৰ হিৰণ বৰণ
শেষ হল ধ্যানৰতা উমাৰ তপস্যা
অতিক্ৰান্ত সাধনাৰ পথ সুকঠিন।
ধ্যান দাপোনত দেখি মোহন মূৰতি
জাগিল পৰম তৃষ্ণা ,
হৃদয় সুৰভি সানি গাঁথে কবিতাৰ মালা
ভক্তিসিক্ত সুৰৰ অঞ্জলি;
আজি সমাগত শুভক্ষণ
চিৰ ঈপ্সিত পৰম প্ৰিয়ই
পিন্ধালেহি মৰণৰ বিজয় তিলক।
এয়া তো নহয় মৃত্যু,
মৃত্যুহীন স্বপ্নদ্ৰষ্টা ৰূপৰ সাধক,
মাটিৰ মায়াত বন্দী মুগ্ধ আতমাৰ
যুগে যুগে উভতি অহাৰ
এয়া মাথো ক্লান্তিহীন নীৰৱ প্ৰস্তুতি।
