এই পৃষ্ঠাটোৰ বৈধকৰণ হৈছে
৮
সৌপ্তিক পৰ্ব্ব।
ভয়াৰ্ত্ত শৰণাগত নিদ্ৰিত যি জন।
বিনাশিলে মহাপাপ নাযায় খণ্ডন॥
নিষেধ নেমানি ইটো কৰয় যি জন।
পঞ্চ পাতকীৰ মাজে পৰয় সি জন॥
মোহোৰ কথাক তুমি শুনা সাৱধানে।
হেনয় কৰ্ম্মক ইচ্ছা নকৰিবা মনে॥
নিজৰ দুষ্কৰ্ম্মে মজিলেক দুৰ্য্যোধন।
ধৰ্ম্মৱন্ত পাণ্ডৱক হিংসি সৰ্ব্বক্ষণ॥
পাণ্ডবৰ সহায় সম্পদ নাৰায়ণ।
তাহান অহিত চিন্তি জীয়ে কোন্জন।
দুৰ্য্যোধন হেতু হিত কৰিবাক মনে।
যুজিলে শক্তিৰ মতে কৰি প্ৰাণপণে॥
সেই সময়ত কিয় নকৈলা হনন।
দুৰ্ব্বুদ্ধি এৰাঁহা বাপা স্থিৰ কৰা মন॥
পিতৃ বৈৰী যদি চোৱা কৰিবে নিধন।
ৰণ মাজে ধৰি তাক কৰা নিপাতন॥
সৎকৰ্ম্ম কৰিবা বাপা সদায় যতনে।
অসৎ ভাবক কিয় ঠাই দিয়া মনে॥
কৃপৰ বচন শুনি দ্ৰোণৰ নন্দন।
দুই চক্ষু ৰক্তবৰ্ণ কৰয় গৰ্জ্জন॥
