এই পৃষ্ঠাটোৰ বৈধকৰণ হৈছে
(১৭)
“নিজ ইচ্ছা মতে ফুৰাঁ যতে ততে,
সকলো দেশতে, অ'তে সংসাৰতে;
বছৰ-শেষত হব প্ৰতি-আগমন।
কৰিম নতুন আজ্ঞা পুনু বিজ্ঞাপন।
(১৮)
“এই এবছৰ ফুৰিবা নগৰ,
পৰ্ব্বত প্ৰান্তৰ, দেশ-দেশান্তৰ;
আত্মাৰ শোধন হেতু কৰিবা প্ৰয়াস।
কৃপাৱন্ত ঈশ্বৰৰ এয়ে অভিলাষ।”
(১৯)
গলোঁ নৰ নাৰী নিজ বাট ধৰি,
কৰি খৰাখৰি, ইচ্ছা অনুসৰি;
আনন্দত হাঁহি-মাতি লৰিলোঁ সকলো।
ভাবিলোঁ ঈশ্বৰ, আহা, কেনে নো দয়ালু!
(২০)
কৰি খৰধৰ, মাৰিলোঁ। লৱৰ;
ভৱ-সংসাৰৰ আহি পালোঁ ঘৰ;
সহধৰ্ম্মিণীক মই চালোঁ হেঁপাহেৰে।
পৰিছে প্ৰিয়াৰ হাঁয় চকুলো ধাৰেৰে!
