এই পৃষ্ঠাটোৰ বৈধকৰণ হৈছে
৪৪
ভক্তি-ৰত্নাৱলী
জানি অবহেলা অতি কৰে যিটোজন।
নৰকৰ পৰা তাৰ নাহি নিবৰ্ত্তন॥২০৫॥
সবাকো ঈশ্বৰ কৃষ্ণে কৰন্ত পোষণ।
নভজে পামৰ যিটো তাঁহান চৰণ॥
কৃতঘ্ন পাতক সম ধৰ্ম্ম ভ্ৰষ্ট হুই।
ঘোৰ নৰকত সিটো পৰে অধো মুই॥২০৬॥
কৃষ্ণেসে পৰম গুৰু পিতৃ ইষ্ট দেৱ।
একান্ত শৰণে ভজি কৰা নিতে সেৱ॥
ঘোৰ কলিযুগ আত পাপেসে প্ৰচুৰ।
যত ধৰ্ম্ম কৰ্ম্ম মানে সবে ভৈল দূৰ॥২০৭॥
বাসুদেৱপৰ ভৈল যিটো মহামতি।
পৰম কৃতাৰ্থ সিসি কলিত সম্প্ৰতি॥
দুৰ্ঘোৰ সংসাৰ ইটো অন্ধ কূপময়।
পৰি আছে আতে কাল-ভুজঙ্গে দংশয়॥২০৮॥
বিষয় বিষত অতি ভৈল অচেতন।
নাহি জ্ঞান স্মৃতি যেন মৃতক লক্ষণ॥
হেনয় প্ৰাণীক কৃষ্ণদেৱ বিনে আন।
কোনে আসি কলিত কৰিবে পৰিত্ৰাণ॥২০৯॥
বুলিবা বিষয় বিষ পৰম দুৰ্ঘোৰ।
হেন বিষে চেতন হৰিল যিজনৰ॥
তাক কেনমতে কৃষ্ণে কৰিবে উদ্ধাৰ।
ইহাৰ উত্তৰ ভক্তি বিনে নাহি আৰ॥২১০॥
