এই পৃষ্ঠাটোৰ বৈধকৰণ হৈছে
পঞ্চম : কীৰ্ত্তন বিৰচন
পদ
দেখাইলো মহিমা কৃষ্ণ কথা শ্ৰৱণৰ।
শুনিলা কৌতুকে সভাসদ নিৰন্তৰ॥
শুনিয়োক আৰো আৰম্ভিলো বিৰচন।
কৃষ্ণৰ কীৰ্ত্তন এৱে কৰো নিৰূপণ॥৬৮৫॥
সংসাৰত যত ধৰ্ম্ম আছে শ্ৰেষ্ঠতৰ।
সমস্ততে কৰি শ্ৰেষ্ঠ কীৰ্ত্তন কৃষ্ণৰ॥
এহি মান অভিপ্ৰায় সকল শাস্ত্ৰৰ।
তপ জপ আদি যত ধৰ্ম্ম পুৰুষৰ॥৬৮৬॥
কৰে বেদ পাঠ যজ্ঞ যাগ যোগ দান।
সমস্তৰে অভিলাষী ফল এহি মান॥
উত্তম শ্লোকৰ গুণ নামৰ কীৰ্ত্তন।
ইহাকেসে কহি আছে মহা জ্ঞানীগণ॥৬৮৭॥
কৰয় কীৰ্ত্তন যিটো জানিবা সাক্ষাত।
সকল কৰ্ম্মক কৰি আছয় পূৰ্ব্বত॥
ভগৱন্ত মাধৱৰ কীৰ্ত্তন নকৰে।
জানিবা তাহাৰ ব্যৰ্থ ধৰ্ম্ম নিৰন্তৰে॥৬৮৮॥
