এই পৃষ্ঠাটোৰ বৈধকৰণ হৈছে
৬৬
নিবেদন ৷
ধন, বস্তু, নিজপ্ৰাণ, আত্মীয়, কুটুম,
সকলোকে দিয়ে বিসৰ্জ্জন,
তোমাক একান্ত মনে সকলোৱে ভজে
তোমাতেই সঁপি দিয়ে মন।
কেতিয়াবা কৰাঁ তুমি ৰঙ্গ ধেমলিও
স্বপ্ন-পট দেখুৱা মনেৰে,
ৰজা পাতা, দুখ দিয়া, হঁহুৱা, কন্দুৱা,
ভোগ দিয়া পানীৰ লাৰুৰে।
আপোন-পেটীয়া তুমি, তোমাৰ লগত
আন কাকো থাকিব নিদিয়াঁ,
খং কৰি যাক তুমি এৰি গুচি যোৱাঁ
কৰা তাক দুৰ্-কপলীয়া।
———
চিন্তা।
মোৰ কথা তুমি ভাল শুনা বা নুশুনা
মই চিন্তা, নোৱাৰো নকই,—
সৰ্ব্ব গুণে গুণী তুমি, বেয়া একো নাই,
তেও লাগে ভয় তোমালই।
