এই পৃষ্ঠাটোৰ বৈধকৰণ হৈছে
২০
নিবেদন।
মৰিলেই মিলোঁ যদি অনন্ত জ্ঞানত,
নাই য'ত একোকে নতুন শিকিবৰ,—
পৃথিবীত দুখ কৰা একো কাম নাই,
কাম নাই সঠিক-বিঠিক বাছিবৰ।
⸻
পুতলা।
পুতলাৰ দৰা কন্যা আইটীৰ খেলা,
পুতলাৰে ধেমালি সদাই,
আখৰা কৰিছে মাথোঁ নিজ জীৱনৰ
ভাৱনায়ো পাবহি বেগাই
সংসাৰ গোটেই খনি পুতলাৰ খেল,
কোনোবাই ধেমালি কৰিছে;
আমিও খেলাৰ বস্তু, নেদেখা জনাই
ধেমালিতে আমাক সাজিছে।
হাহি উঠে দেখি মোৰ পুতলাৰ লীলা,
পুতলাই পুতলা সাজিছে,
পুতলাই পুতলাকে বেচিছে কিনিছে,
পুতলায়ে ৰঙ্গত নাচিছে।
⸻
