এই পৃষ্ঠাটোৰ বৈধকৰণ হৈছে
১৩
উন্নতি।
বিশ্বৰ সৌন্দৰ্য্য সদাই থাকিব
তুমিহে কেনিবা যাবা,
বিশ্বৰ নিয়ম আছে একে দৰে
ভাঙ্গিলেই গম পাবা;
তুমি নেথাকিলে প্ৰকৃতি দেবীৰ
একোকে নহ’ব হানি,—
তুমিহে নেলাগে নেথাকে যদিও
এটিও ধৰাত প্ৰাণী।
⸻
উন্নতি।
থাকিবনে চকু মোৰ সদাই জপোৱা?
নিশ্চয় এদিন দেখা পাম;
টোপনি ভাগিলে মোৰ সাৰ পাই উঠি
এই চকুৰেই মই চাম।
যেয়েবা কৰক কাম, তাৰ অংশ মোৰ
কোনেও নোৱাৰে হেৰুৱাব,
লোকৰ জ্ঞানেৰে মই নিজ পোহৰাম,
পাপে মোক ছুব নোৱাৰিব।
