পৃষ্ঠা:ধনন্তৰী বধ.djvu/৩

ৱিকিউৎসৰ পৰা
এই পৃষ্ঠাটোৰ বৈধকৰণ হৈছে

শ্ৰীশ্ৰীমনসা বন্দনা

বন্দো নাগমাতা  শিবৰ দুহিতা
 আস্তিক মুনিৰ মাতা।
কমল বনত  শিব বীৰ্য্য হৈতে
 জন্ম লৈলা পাতালত॥
তুমি ত্ৰিনয়নী  জগত জননী
 তুমি দেবী বিষহাৰী।
নাগৰ আসন  নাগৰ ভূষণ
 তুমি দেবী জৰৎকাৰী॥
হংসৰ বাহনে  ত্ৰিলোক তাৰণে
 তুমি দেবী অৱতাৰ।
নেতাৰ সংহতি  ফুৰি দিনে ৰাতি
 জগত কৰা উদ্ধাৰ॥
তোমাৰ মহিমা  দিতে নাৰে সীমা
 তোমাৰ অনন্ত ৰূপ।
ভক্তৰ গৃহত  চতুৰ্ভূজৰূপে
 ঘটত হোৱা স্বৰূপ॥
ভক্তিভাবে যিটো  তোমাক পূজয়
 সিটো মোক্ষ ফল পায়।।
মই মুঢ়মতি  নেজানো ভকতি
 প্ৰসন্নচন্দ্ৰই গায়॥