এই পৃষ্ঠাটোৰ বৈধকৰণ হৈছে
দেৱধ্বনি
(৭৩)
এইনে সপোন, এই নে ভুল?
অলীকত ভেল্কী লগা উন্মাদৰ অট্টৰোল,
—মাথো সপোন, মাথো ভুল!
বিশ্ব যদি মায়াৰ বেৰা,
জীৱন পঞ্চ ভূতৰ পীড়া,
বিস্মৃতিৰ অন্ধকূপত হেঁচা ঠেলা হুলস্থুল,—
মাথো ফাকি, মাথো ছল,
মিছা মোহ—আপোন-পৰ,
নিদ্ৰাজালত দিঠক দেখা হাঁহি-কান্দোন প্ৰলাপৰ—
(তেন্তে )——কিয় যৱনিকা ডাঙি
মূঢ়তাৰ স্তম্ভ ভাঙি
হৃদয়-প্ৰাচীৰ চুৰ্ণ কৰি
নুঠা প্ৰভু-নৰহৰি
সকল তৰ্কৰ ভাঙি মূল?
কাতি, ১৮৪৪ শক ]
