এই পৃষ্ঠাটোৰ বৈধকৰণ হৈছে
দেৱধ্বনি
(৬০ )
বহু দিনৰ প্ৰিয় সখি-
বহু দিনৰ অন্তে আজি—
তোমাৰে মোৰ দেখা দেখি!
এৰি গলা যি দিন ধৰি,
সঙ্গী হল জেং জাবৰি;
এন্ধাৰে মোৰ দুৱাৰ-ৰক্ষী;—
—এৰা বাৰীত আছোঁ পৰি
নিজ গৰিমা আশ্ৰয় কৰি
নিৰানন্দ চিত্ত দুখী।
দুনাই কিয় শূন্য পঁজাৰ
তুলি আজি দুৱাৰ-হেঙাৰ
হলাহি মোৰ মুখামুখি?
আজিতো মই নিৰুপায়
শক্তিহীন অসহায়—
তোমাকতো মই নাপাওঁ ঢুকি!
শুদা হাতে দিলোঁ বিদায়;—
নধৰিবা দোষ দায়
বাল্যকালৰ বন্ধু সখি
পুহ, ১৮৫৬ ]
