এই পৃষ্ঠাটোৰ বৈধকৰণ হৈছে
( ৩১ )
লক্ষেক নৃপতি লেখত কৰিয়া
যদি নুন্যাধিক হয়।
দশ কুৰি যদি তাত টুটা হয়
নৰেন্দ্ৰ তেওঁ বোলয়॥ ২৮৮
পদ
তিনিও কালৰ কথা কহিলো সম্প্ৰতি।
কলিৰ কথাক আৱে শুনিও পাৰ্ব্বতী॥ ২৮৯
কলিৰ নৃপতি সব মোৰ অংশে জাত।
তাসম্বাৰ কথা আৱে কহিবো তোমাত॥ ২৯০
কলিৰ আদ্যত ধৰ্ম্মপুত্ৰ যুধিষ্ঠিৰ।
শতেক বৎসৰ ৰাজা হৈবে মহাবীৰ॥ ২৯১
জম্বুদ্বীপ অধিপতি পৰম গহণ।
বিপ্ৰ বৈষ্ণৱক পালিবেক সৰ্ব্বক্ষণ॥ ২৯২
তান নাতি পৰীক্ষিত হুইবে নৃপবৰ।
মহাধনুৰ্দ্ধৰ বীৰ নাহি আত পৰ॥ ২৯৩
তৰুণ কালত তেহো শৰীৰ তেজিব।
ঈশ্বৰৰ ইচ্ছা ব্ৰাহ্মণক বিতৰ্কিব॥ ২৯৪
কলিকো নিগ্ৰহি কৰিবন্ত মহামানি।
তক্ষকে দংশিব তাক পূৰ্ব্ব শত্ৰু জানি॥ ২৯৫
মহা মুনি শুকে কৈব ভাগৱত শাস্ত্ৰ।
এতেকে হুইবে ৰাজা মুকুতিৰ পাত্ৰ॥ ২৯৬
