এই পৃষ্ঠাটোৰ বৈধকৰণ হৈছে
তাৰকাসুৰৰ যুদ্ধ।
বুজিয়ো নুবুজে পাই হাততে প্ৰমাণ।
দেখিয়ো নেদেখে কিনু মানব অজ্ঞান॥
অজ্ঞানে জীবক বেঢ়ি থাকে যত কাল।
হৰি ভকতিক মনে নলাগয় ভাল॥
তথাপি যতন যদি নেড়ে মাধবত।
পাছে অল্পে অল্পে সুখ লভয় মনত॥
দীৰ্ঘকাল অভ্যাস কৰিলে ভকতিক।
লভয় পৰমানন্দ অনন্ত প্ৰীতিক॥
অভ্যাস একান্ত চিত্ত ভকতি বিশ্বাস।
মুকুতি মাধব দুয়ো চাৰিয়োৰ দাস॥
জানি নৰে অভ্যাসে কৰিয়ো শুদ্ধমন।
এক চিত্তে চিন্তিয়োক মাধব চৰণ॥
দুৰ্লভ মানব জন্ম নকৰা বিফল।
হৰিক আৰাধি সাধিয়োক মোক্ষ ফল॥
মুকুতিক বাঞ্চা যদি এড়া আন কাম।
ভজিয়ো হৰিৰ পদে বোলা ৰাম ৰাম॥
⸻৹⸻
সমাপ্ত।
