এই পৃষ্ঠাটোৰ বৈধকৰণ হৈছে
১৯
তাৰকাসুৰৰ যুদ্ধ
দিতিৰ পুত্ৰক হৰি মাৰিলন্ত
দণ্ড দিয়া দেবতাক।
হাথী চোৰ কৰি আগে আগে যাই
বান্ধস মূলা চোৰক॥
হাসিয়া বজ্ৰাঙ্গে বোলয় বচন
শুনা বৃদ্ধ পিতামহ।
তযু পৰি নাতি চোৰ সাধু চিনোঁ
মোৰ আগে কিবা কহ॥
তথাপিতো বোলুঁ চিন্তা নকৰিবা
নমাৰিবুঁ দেবতাক।
মাতৃৰ আগত দেখায়া মেলিবুঁ
বুলিয়া কাকুতি বাক॥
ব্ৰহ্মাৰ চৰণে প্ৰণামি বজ্ৰাঙ্গে
গৈলন্ত দিতিৰ পাশ।
দেবতা গণৰ বন্ধন দেখিয়া
দিতিৰ ভৈলা হৰিষ॥
বজ্ৰাঙ্গ বদতি শুনা আই দিতি
মই কহুঁ সত্য বাক।
অদিতি মাতৃত কৰি শত গুণে
দেবৰ স্নেহ তোমাক॥
তোমাৰ বচন শুনি দেবগণে
আপুনি লৈলা বন্ধন।
সবে দেবে মিলি আমাসাক প্ৰতি
কৰিলেক বহুমান॥
মিছাতেসে আমি কৰোঁ শত্ৰুভাব
মহা সাধু দেবগণ।
অভ্যাসৰ গুণে হোৱে শত্ৰু মিত্ৰ
শুনিয়ো মোৰ বচন॥
