এই পৃষ্ঠাটোৰ বৈধকৰণ হৈছে
ঘাটজাল
মাছ কেতেবেলি নাচ কেতেবেলি .......
টঙিৰ ওপৰত জীৱিকাৰ অচঞ্চল মুদ্ৰা
সোঁতত সাঁতোৰে চঞ্চল চকু
সৃষ্টিৰ প্ৰথম সন্তান এই বাটে
এই বাটে আহ
বাঁহ নাই সাহ নাই
ধান নাই মান নাই
নৈ আছে চকুলোৰ
দুখ তাত জীয়নীয়া মাছ
কপালত খুঁটিয়াই
গলধনেৰে নামি যায় বেলি
গধূলিৰ হেঁপাহ ভগাই
গুচি যায় জালৰ গৰাকী
এসেৰ চাউলেৰে চমুৱাব নোৱাৰি দীঘল পদূলি
পানীবোধ বিক্ৰী হয়
নৈখনৰ গৰাকী ওলায়
পোহাৰী-হিচাপ কৰা আঙুলিৰ পাবে পাবে
শতকৰা অংক দি
মাছবোৰ কোনে লৈ যায়!
২১
