এই পৃষ্ঠাটোৰ বৈধকৰণ হৈছে
৭২
জনকাব্য
তোমাৰ কটা তামোল নাখাওঁ, ঐ লাহৰী,
আমাৰ মৰি যাব কুল।
অজাতি নহওঁ মই, বিজাতি নহওঁ মই,
তোমাৰ আমাৰ একেটি কুল॥ ৩৫১।
তামোলৰ আমোল- মোল, লগৰীয়া,
তামোলৰ আমোল-মোল।
ক’ৰ পৰা আহিলি দেৱা চালি খোৱাটো,
তামোলৰ নাজান মোল॥ ৩৫২।
তিতাকৈ কেৰেলা লহঙে-পহঙে,
মিঠানো নহলি কিয়।
তইনো পিলিঙা লহঙে-পহঙে,
একে কুলৰ নহলি কিয়॥৩৫৩৷
কাপোৰত বাচিলোঁ ইলাচি-বিলাচি,
ৰিহাত বাচি গলো কেচ্।
কটা তামোলখনি খোৱাঁ লাহে কৰি,
লাগিছে কি গুণে পেচ॥ ৩৫৪।
ফুলনি বাৰীলৈ চাই পঠিয়ালোঁ,
ধুনৰ কোন পাহি ফুল৷
তোমাৰ লগতে দেহা দিলোঁহেঁতেন,
তুমি হলা অজাতি কুল॥ ৩৫৫।
